Friday, August 04, 2006

خطة الصول عبد الله لغزو اسرائيل

و الله زمان يا سلاحي..اشقاتلك في كفاحي
افتكرت الاغنية دي و أنا قاعد عمال اسمع العلامة العسكري ..الجنرال ..الكوماندا الكبير أوي ..موحد البهم و راعي الغنم.. سدد الله خطاه.. و
غفر له خطاياه..الشيخ الصول عبد الله صالح.. ملك الحركات..و نجم الشقلباظات..ربنا يثبت مفاصله ..قول آمين
عبقرينو المعارك و الحرب و القتال و التمثيليات السياسية كمان عملنا خطة جهنمية علشان نكسب اسرائل في الحرب.. بس قبل ما تسمع الخطة
..فتح عينك و سلك ودانك و اسمع القنبلة العسكرية اللي فجرها الصول عبد االه صالح
قال إية الخطة و ما فيها ان دول الجوار لاسرائيل تفتح الحدود مع اسرائيل علشان المقاتلين يهجموا علي اسرائيل و يقطعوها حتت.. شفتوا
العبقرية ..شفتوا الشجاعة..شفتوا القات اللي الراجل ده بيضربه بيعمل اية في الدماغ..ده القات ده شكله دماغه عالية أوي!!..يا جماعة
الراجل لخص 50سنة حروب في كلمتين..فتح الحدود للمقاتلين
بس الراجل نسي يحدد مين المقاتلين دول.. بس ياريت و حياة امك ما يبقوش يمنين اصل الموضوع مش ناقص دمغة عالية
و الراجل برضه نسي يقول لنا فين هي الحدود اللي تتفتح..
مصر ماشاء الله عليها..فاتحة حدودها ع الاخر كل كام يوم دبابة اسرائيلية تعدي تقتل كام عسكري مصري غلبان مالوش واسطة ولا ضهر..ما هو لو كان ليه واسطة ما كانش جه هنا ع الحدود ..و لو كان ليه ضهر ما كانتش الدبابة تتجرا و تبوصله حتي
تعالي بقي ع الاردن..مفخرة العرب..تاريخ الهاشميين معروف في الخيانة و التواطؤ و ما ينفعش نظلمهم و نطلب منهم فتح الحدود
فلسطين..ما هي متباعة و متخانة و متقطعة من 50سنة..!!؟؟
لبنان و عملت اللي عليها و اكثر..بس شوف العرب عملوا معاها اية..
قوم لوط السعوديين أول حاجة عملوها قالوا ان حزب الله دول شيعة و ما ينفعش نساعدهم..شفت يا عم الدعم..بس هما بس فالحين يدعموا نانسي و هيفا و بقية المومسات اللي في لبنان..
ما هو حسن نصر الله لو كان مزة كان ظبطهم و ظبطوه...!!؟؟؟
تعالي بقي علي سوريا..و علي رأي المثل ما أسخم من سيدي إلا ستي..30سنة من غير رصاصة واحدة توحد ربنا في الجولان...!!؟؟

13 comments:

محمد النقيب said...

وانا من هذا المنبر اطالب باستيراد القات من اليمن عشان الشعب المصري كله يعمل الدماغ دي..

Anonymous said...

ضحكتني.. شر البلية ما يضحك فعلاً..

Anonymous said...

متزعلش نفسك يا cortex
الراجل معذور بردو
لسه راجع في كلامه من كام يوم
عشان يكمّل في المريسة


عاوز الشعوب العربية الغبية تسكت
بيسكّتها بالكلمتين دول، وعارف انهم مش هيروحوا أي مكان
حتى ولو فتحوا الحدود

بس الراجل مش عارف ان الشعوب اصلاً ما اتكلمتش عشان تسكت!!


شكله مخزّن وجاي..

Mamdouh Dorrah said...

منار منجد

أنا مش زعلان بس أنا مش بحب الغباء و النطاعة
اصل ما بقاش غير النطع دة علشان يتكلم و ياريته فاهم حاجة
و برضه هو فكرني بنطع تني قال انه هيلغي حبس الصحفيين و عمل قانون جديد للحبس
يالا احنا هنلاقيها منين و الا منين

GERALIDINE

علي رأيك..شر البلية فعلا

محمد النقيب

الواجب ده عندي
اديني في لهايف و ان احبك يا نننس
ههههههههه
مسا يا صاحبي

admelmasry said...

ههههههه
ولسه ياما

Mamdouh Dorrah said...

ايه يا ادم
انتي فين يا عم

بعدك على بالى said...

صديقى العزيز الرائع انسانيا


ها أنت تكشف هنا عن وجه أخر من تميزك

اضافة للشعر الذى ثبت أقدامك على ارضه

أشكرك على مساندتك .. دمت لى

خالص تحياتى

manwella said...

والله أحلى حبوب صراحه طلعت البوست ده,ياريت ترمى شويه منها فى النيل يمكن يبطل العملاء من خطباء المساجد الكلام الساذج اللى عايزين يطمسوا بيه دماغ الناس وتقليعة من دعا لحسن نصر الله فهو كافر

Doaa Samir said...

لا والله!!!
هو حد كان فاكر إنه فيه حدود
الحدود على الخريطة وبس.. مش بتشوف مبارك وألمرت كانوا حاضنين بعض ازاي بحميمية لما كان هنا مش بيقول حاجة عن مقتل الجنديين؟؟؟ بقى فيه في الحميمية حدود؟؟!!

غادة الكاميليا said...

والله كنت عايزة أقول اللي قالته بعدك على بالي فعلاً عجبتني رؤيتك أوي للموقف وأخذك ليه بالصورة دي عجبتني جدا حتى لو كنت كاتبها بالعاميه فعلا كويس بس كنت متوقعه قصيده
ماشي نستنى تاني
الأغنيه تاني برده روعه
مكمله البوست

saso said...

لا معلش بقي ماهو اللة يخليهولنا سي جرانة ( دة اسم دة ) علق البرامج المشتركة بيننا وبين اسرائيل ماشاء اللة خط انابيب الغاز مش مشكلة علشان دة مش هيوجع اسرائيل لكن السياحة هي اللي هتخليهم يصرخوا ويسيبوا لبنان ومش بعيد يجلو الجولان في السكة
اةة انت نسيت السبع بتاع ليبيا اللي محدش سامع صوتة من يوم مادفع التعويضات وهو هادييي

Mamdouh Dorrah said...

saso
المشكلة يا ساسو ان كل واحد فيهم عاملي فيها الست العاقلة الراسية..الله يخرب بيوتهم كلهم

غادة الكاميليا
ميرسي يا غادة..

doaa samir
و الله دي حاجة تحزن

manwella
دي حتي النيل وسخوه..حسبي الله و نعم الوكيل

بعدك علي بالي
عيب ما تقوليش كدة

epitaph
دي كانت تجربة لحاجة بفكر اعملها من زمان و تقريبا التجربة نجحت

الشباب العربي said...

حبيبي ممدوح
يا درة الشباب العربي
كلماتك حلوة وجريئة وأعجبتني كثيراً
لا تنسى أننا نعيش في عالمنا العربي بخير وبنأكل همبورجر وصار عندنا مطاعم للكنتاكي وهذا ما كان لو ............
وبعيدن معاك ما تكثر غلبة وإلا .............
زهقنا العدس والكوشري